Assalamu’alaikum Wr. Wb
Kawilujengan, karaharjan, rahmat
saha hidayahipun Gusti ingkang Mahasuci mugi tansah tunendhak lan kasarira kita
sedaya.
Para sesepuh, para pinisepuh kakung
miwah putri ingkang luhur ing budi lan kula bekteni, sagung para tamu
sinedhahan ingkang tansah winantu ing pakurmatan, para ingkang sami rawuh
ingkang bagya mulya, dalah para kadang kaneman muda/mudi ingkang kula tresnani.
Minangka pambuka inggih purwakaning
atur, mangga kita sedaya tansah hangonjukaken puja astawa puji astuti raos
syukur wonten ngarsanipun Allah SWT, pangeran ingkang Mahawikan, dene kita
sedaya tansah pinaringan kesarasan sami saged rawuh wonten dalemipun Bapak saha
Ibu Sukidi kanthi wilujengan.
Shalawat dalah salam kita aturake
wonten ngarsanipun Nabi kita, Nabi Agung, Nabi Muhammad SAW, Nabi Ingkang
sampun nilaraken dhumateng kita sedaya agami Islam, agami ingkang dipunridhai
Allah kanti kita pinaringan gegebengan Al-Qur’an saha Al-Hadist, minangka
Rahmatan Lilalamin.
Bapak-bapak/ Ibu-ibu ingkang kula
bekteni, para kadang kaneman muda/mudi ingkang kula tresnani dalah para tamu
sinedahan ingkang bagya mulya. Kula minangka sulih salira inggih talanging basa
sederek kadang kaneman muda/mudi Dukuh Pondok, Bakalan, Polokarto, kepareng
matur dhumateng Bapak Sukidi sak keluarga ingkang sampun panjenengan utus ngaturaken serat sedahan/ ulem dumateng sanak
sederek panjengan sedaya sampun kaaturaken. Menawi wonten kathah kekirangan
samukawisipun kula saha sak kadang kaneman muda/ mudi nyuwun pangapunten.
Minangka panutuping atur, menawi
anggen kula matur minangka sulih salira inggih talanging basa para kadang
kaneman muda/ mudi Dukuh Pondok, Bakalan, Polokarto angaturaken wigatining gati
kathah kekirangan, saha kalepatipun, lumantar kula tansah nyuwun lumunturing
samodra pangaksama.
Bilahit taufiq wal hidayah
Wassalamu’alaikum Wr. Wb.